Öflug kaskótrygging án sjálfsábyrgðar fyrir fartölvur og spjaldtölvur

•             Tryggir spjald- og fartölvuna þína fyrir:

                - Ófyrirsjáanlegu óhappi

                - Brunatjóni

                - Innbrotsþjófnaði

                - Skemmdaverkum

•             Engin sjálfsábyrgð

•             100% Fullar bætur á fartölvu

•             Trygging í 2 ár frá kaupdegi

•             Aðeins fyrir einstaklinga

Á kynningarverði aðeins kr. 9.990

Vátryggingarsamningurinn

1.gr. Hverjir eru vátryggðir?

Kaupendur að fartölvu hjá Tölvutek verslun sem fengið hafa afhent vátryggingarskírteini til staðfestingar á vátryggingavernd eru vátryggðir. Vátryggingin er ekki til hagsbóta fyrir aðra aðila svo sem veðhafa eða nýjan eiganda hins vátryggða. Ef eigendaskipti verða að hinu vátryggða gildir vátrygging­in þó fyrir nýjan eiganda í 14 daga frá eigendaskiptum, sbr. 40. gr. laga nr. 30/2004.

2.gr. Vátryggingarsvið

Vátryggingin bætir beint tjón á hinu vátryggða sem verður vegna skyndilegs og ófyrirsjáanlegs utanaðkomandi atviks sem ekki er gert undanþægt í skilmálum þessum.

Bótaskylda félagsins takmarkast þó við að fartölvan sé yngri en 2 ára þegar tjónsatvikið verður.

3.gr. Hvar gildir vátryggingin

Vátryggingin gildir hvar sem er í heiminum

4.gr. Vátryggingin bætir ekki:

4.1 Tjón sem orsakast af framleiðslugalla, efnisgalla, samsetningargalla, rangri tengingu, titringi eða hitaleiðni.

4.2 Slit sem leiðir af eðlilegri notkun, hægfara eyðingu eða rispur á máluðum eða lökkuðum flötum eða flögnun þeirra, ryðskemmdir, tæringu, sviðsskemmdir eða viðhaldskostnað.

4.3 Tjón sem stafar af ónógu viðhaldi eða umsjón.

4.4 Atvik sem eingöngu verða rakin til gangtruflana.

4.5 Kostnað við endurnýjun eða endurvinnslu, tapaðra eða skemmdra gagna, þ.m.t. hugbúnaðar.

4.6 Tjón sem hlýst af rangri forritun, röngum innslætti, rangri ísetningu, rangri textun eða hnökrum, eyðingu eða öðrum skemmdum á innslegnum gögnum.

4.7 Rekstrartjón eða annað óbeint tjón, þ.á.m. aukakostnað sem stofnað er til í því skyni að koma í veg fyrir rekstrartruflanir.

4.8 Tjón sem seljandi, viðgerðaraðili eða flutningsaðili ber ábyrgð á samkvæmt samningi eða lögum.

4.9 Tjón sem verður vegna áhrifa loftslags eða andrúmslofts.

4.10 Tjón vegna ónógra eða lélegra umbúða.

4.11 Tjón af völdum þjófnaðar sem ekki telst innbrotsþjófnaður eða rán, þó bætist tjón af völdum þjófnaðar úr:

- læstum bíl;

- læstri hirslu eða læstu rými innan skólastofnunar eða bókasafns.

Það er forsenda fyrir bótaskyldu að á vettvangi séu ótvíræð merki um að brotist hafi verið inn.

4.12 Hvers konar afleidd tjón.

4.13 Tjón sem verður þegar hið vátryggða hefur gleymst, týnst eða mislagst.

5.gr. Varúðarreglur og viðhald

Varúðarreglur eru hátternisreglur sem settar eru í því skyni að koma í veg fyrir og takmarka tjón. Það er forsenda fyrir greiðslu bóta að settum varúðarreglum sé ávallt fylgt.

Hafi vátryggður valdið því að vátryggingar­atburður varð með því að hlíta ekki varúðarreglum eða öðrum fyrirmælum í vátryggingarsamningi má lækka eða fella niður ábyrgð félagsins, sbr. 26. gr. laga nr. 30/2004.

Bótaskylda félagsins er háð eftirgreindum skilyrðum:

Að fylgt sé leiðbeiningum framleiðanda eða seljanda hins vátryggða um hirðu, notkun, álag eða viðhald þess.

Dyr, gluggaop og önnur op inn á þann stað sem hið vátryggða er geymt skulu vera tryggilega læst og lyklar geymdir þannig að óviðkomandi hafi ekki aðgang að þeim.

6.gr. Vátryggingarfjárhæðir - verðbreytingar

Í vátryggingarskírteini eða iðgjalds­kvittun er getið um vátryggingar­fjárhæðir.

Vátryggingarfjárhæðir fylgja þróun verðlags í landinu og breytast í samræmi við breytingar á vísitölu neysluverðs án húsnæðis frá upphafsdegi vátrygging­ar­­tímabilsins.

Verði hætt að birta framangreinda vísitölu, getur félagið miðað breytingar við aðrar samsvarandi opinberar vísitölur.

Tjón bætast í samræmi við þá vátryggingarfjárhæð sem í gildi er á tjónsdegi. Um vexti af bótafjárhæðum fer samkvæmt 50. gr. laga nr. 30/2004.

7.gr. Tvítrygging

Ef hagsmunir þeir sem vátrygging þessi tekur til eru einnig vátryggðir með annarri vátryggingu getur vátryggður valið úr hvaða vátryggingu hann krefst bóta, þar til hann hefur fengið þær bætur sem hann á kröfu til.



Ef fleiri en eitt vátryggingafélag bera ábyrgð á tjóni skulu þau, sé ekki um annað samið, greiða bætur hlutfallslega eftir ábyrgð hvers þeirra um sig á tjóninu. Því getur það félag, sem bætir tjónið, endurkrafið önnur félög hlutfallslega.

8.gr. Aukin áhætta

Vátryggður skal tilkynna félaginu eða verslun Tölvuteks tafarlaust um breytingar sem varða hina vátryggðu áhættu.

Sé látið hjá líða að veita félaginu slíkar upplýsingar getur bótaréttur fallið niður að hluta eða öllu leyti samkvæmt reglum 24. og 25. gr. laga nr. 30/2004.

9.gr. Gildistími

Sé ekki annað ákveðið í vátryggingarskírteini tekur vátryggingin gildi á þeim degi sem vátryggingarskírteini/greiðslukvittun er dagsett. Gildistími vátryggingarinnar kemur fram á vátryggingaskírteini/greiðslukvittun Tölvuteks. Gildistími er þó aldrei lengri en 2 ár.

10.gr. Iðgjaldið

Kaup vátryggðs á fartölvu frá Tölvutek verslun sem fartölvutrygging er gefin út vegna eru ígildi greiðslu iðgjalds af hans hálfu. Tölvutek greiðir félaginu iðgjald vegna vátryggingarinnar.

11.gr. Brot á upplýsingaskyldu -svik og rangar upplýsingar

Upplýsingar um áhættuna

Hafi vátryggingartaki eða vátryggður sviksamlega vanrækt upplýsingaskyldu sína um atvik sem haft geta þýðingu fyrir mat félagsins á áhættu og vátryggingar­atburður orðið ber félagið ekki ábyrgð, sbr. 1. mgr. 20. gr. laga nr. 30/2004.

Hafi vátryggingartaki eða vátryggður með öðrum hætti vanrækt upplýsingaskyldu sína í þeim mæli að ekki telst óverulegt fellur ábyrgð félagsins niður í heild eða að hluta, sbr. 2. mgr. 20. gr. laga nr. 30/2004.

Upplýsingar við uppgjör bóta

Ef vátryggður veitir af ásetningi rangar eða ófullnægjandi upplýsingar við uppgjör bóta fellur niður allur réttur hans samkvæmt þessum og öðrum vátryggingarsamningum vegna hins tiltekna vátryggingaratburðar, sbr. 2. mgr. 47. gr. laga nr. 30/2004. Í slíkum tilvikum getur félagið sagt upp öllum vátryggingarsamningum sínum við vátryggðan með einnar viku fyrirvara, sbr. 3. gr. skilmála þessara.

12.gr. Vátryggður veldur vátryggingaratburði

Ásetningur

Hafi vátryggður af ásetningi valdið því að vátryggingaratburður varð ber félagið ekki ábyrgð, sbr. 1. mgr. 27. gr. laga nr. 30/2004.

Stórkostlegt gáleysi

Hafi vátryggður valdið því af stórkost­legu gáleysi að vátryggingaratburður varð eða afleiðingar hans urðu meiri en ella hefði orðið má lækka eða fella niður ábyrgð félagsins, sbr. 2. mgr. 27. gr. laga nr. 30/2004.

13.gr. Háttsemi annarra einstaklinga en vátryggðs - reglur um samsömun

Ákvæði sem kveða á um að réttur vátryggðs til bóta skerðist eða falli niður vegna athafna eða athafnaleysis vátryggðs, eiga einnig við um bótarétt vegna samsvarandi háttsemi þeirra aðila sem tilgreindir eru í a. og b.lið 2. mgr. 29. gr. laga nr. 30/2004.

Í vátryggingum sem tengjast atvinnustarfsemi gildir hið sama um bótarétt vegna háttsemi starfsmanns vátryggðs sem ber ábyrgð á því sviði sem vátryggingin tekur til.

14.gr. Tilkynning um tjón – Ákvæði um tjón – Hvernig eru bætur ákvarðaðar?

Tjón skal tilkynna Tölvutek svo fljótt sem verða má. Innbrot skal jafnframt tilkynna lögreglu þegar í stað með ósk um rannsókn. Verði tjón erlendis skal skýrsla lögreglu á staðnum fylgja tilkynningu um tjónið.

Vátryggingin bætir sanngjarnan kostnað við viðgerð á hinu vátryggða tæki eða við að skipt sé um íhlut í því eða bætt er með nýju tæki sömu tegundar eða gerðar eða, sé það ekki hægt, með samsvarandi tæki. Tölvutek áskilur sér rétt til þess í samráði við félagið að ákveða hvort gera eigi við tæki eða hvort það skuli bætt með samsvarandi tæki.

Við tjón, sem unnt er að bæta með viðgerð, greiðist eðlilegur viðgerðarkostnaður þannig að hið vátryggða verði eins og það var rétt fyrir tjónið. Við mat á bótarétti er miðað við nývirði tækja.

Sé um altjón að ræða, þ.e.a.s. ef kostnaður við viðgerð er jafnhár eða hærri en nývirði er vátryggðum afhent sambærilegt tæk við það sem varð fyrir tjóni.

Greiði félagið bætur fyrir altjón fellur vátryggingin úr gildi. Fjárhæð bóta vegna skemmda sem verða á gildistíma vátryggingar skal ekki fara fram úr vátryggingarverðmætinu.

Bætur eru ekki greiddar í reiðufé.

15.gr. Frestur til að tilkynna um tjón - fyrning

Vátryggður glatar rétti til bóta ef:

1. hann tilkynnir ekki félaginu eða verslun Tölvuteks um kröfu sína innan árs frá því að hann vissi um atvik sem hún er reist á;

2. hann hefur ekki höfðað mál eða krafist meðferðar málsins fyrir úrskurðarnefnd í vátryggingamálum innan árs frá því að hann fékk skriflega tilkynningu um að kröfu hans væri hafnað, sbr. 51. gr. laga nr. 30/2004.

Krafa vátryggðs um bætur getur fyrnst samkvæmt reglum 52. gr. laga nr. 30/2004.

16.gr. Ráðstafanir til varnar tjóni

Þegar það tjón sem vátryggt er gegn hefur gerst eða hætta er á að verði, ber vátryggðum að reyna að afstýra því. Vátryggður skal gefa félaginu kost á að skoða og meta tjónið áður en viðgerð hefst eða skemmdum munum er ráðstafað.

Vanræksla í því efni getur varðað lækkun eða missi bóta, sbr. lög um vátryggingarsamninga nr. 30/2004.

17.gr. Tjón af völdum styrjaldar, kjarnorku, hryðjuverka eða náttúruhamfara

Félagið bætir ekki tjón eða kostnað sem beint eða óbeint orsakast af styrjöld, innrás, aðgerðum erlendra óvina, ófriðarátökum (hvort sem styrjöld hefur verið lýst yfir eða ekki) borgarastyrjöld, vopnaðri andspyrnu, byltingu, uppreisn, uppreisn gegn yfirvaldi, uppþoti, verk­falli, herstjórn eða valdránsstjórn, her­lögum eða herkví eða atvik eða orsakir sem ráða úrslitum um að lýst sé yfir gildistöku herlaga eða umsátursástandi.

Félagið bætir ekki tjón eða kostnað sem að einhverju eða öllu leyti stafar beint eða óbeint af eða á upptök sín í eða frá:

1. jónandi geislun eða mengun af völdum hvers konar kjarnorkueldsneytis eða hvers konar kjarnorkuúrgangs eða brennslu kjarnorkueldsneytis;

2. geislun, eitrun, sprengingum eða öðrum hættulegum eða mengandi eiginleikum frá kjarnorkustöðvum, kjarnaofnum eða öðrum kjarnorkubúnaði eða hluta þeirra;

3. hvers konar vopnum þar sem beitt er frumeinda- eða kjarnaklofningu og/eða samruna frumeinda eða kjarna eða öðrum svipuðum kjarnahvörfum, geislaafli eða geislandi efni.

Félagið bætir ekki tjón, kostnað eða útgjöld sem beinlínis eða óbeinlínis stafa af lífefnamengun eða efnamengun vegna hvers konar hryðjuverka, án tillits til hugsanlegra samverkandi orsaka.

Hryðjuverk merkir hér verknað, þar með talið en ekki takmarkað við, valdbeitingu eða ofbeldi og/eða hótun um slíkt, af hálfu einstaklings eða hóps einstaklinga, hvort sem hann eða þeir starfa einir sér eða af hálfu eða í tengslum við ein eða fleiri samtök eða stjórnvöld, ein eða fleiri, og sem framinn er í stjórnmálalegum eða trúarlegum tilgangi, í hugsjónatilgangi eða í þjóðernislegum tilgangi eða af slíkum ástæðum, þar með talið í því markmiði að hafa áhrif á stjórnvöld og/eða að vekja ótta hjá almenningi eða hjá hluta almennings.

Mengun merkir hér spillingu, eitrun eða hindrandi og/eða takmarkandi áhrif á notkun hluta og efna vegna áhrifa frá efnasamböndum og/eða lífefnum.

Félagið bætir ekki tjón sökum eldgosa, jarðskjálfta, skriðufalla, snjóflóða, vatnsflóða og annarra náttúruhamfara.

18.gr. Endurkröfuréttur

Eigi vátryggður fébótakröfur á hendur öðrum vegna bótaskylds tjóns, öðlast félagið þann rétt að svo miklu leyti sem það hefur greitt vátryggðum bætur. Vátryggður skal í slíkum tilvikum gera nauðsynlegar ráðstafanir til þess að tryggja kröfuna þar til félagið getur sjálft gætt hagsmuna sinna.

19.gr. Ágreiningur um bætur

Verði ágreiningur um vátrygginguna skal íslenskur dómstóll skera úr honum samkvæmt íslenskum lögum, nema annað leiði af þjóðréttarsamningi sem Ísland er bundið af.

Ágreining um bótaskyldu félagsins, þ.m.t. sök og sakarskiptingu skaðabótaskyldra aðila, má leggja fyrir Tjónanefnd vátryggingar­félaganna. Meðferð máls hjá nefndinni er aðilum að kostnaðarlausu. Með greiðslu málskotsgjalds er unnt að leggja ágreining um bótaskyldu, sök og sakarskiptingu auk ágreinings um atriði, er varða ákvæði laga nr. 30/2004 um vátryggingarsamninga, fyrir Úrskurðarnefnd í vátryggingamálum, sem vistuð er hjá Fjármálaeftirlitinu. Málskotseyðublað vegna úrskurðarnefndarinnar er unnt að nálgast hjá félaginu, auk fyllri upplýsinga um starfssvið og starfsháttu beggja nefndanna.

Málsmeðferð fyrir nefndum þessum skerðir ekki rétt málskotsaðila til þess að leggja málið fyrir almenna dómstóla.

20.gr. Varnarþing

Varnarþing félagsins er í Reykjavík. Mál sem kunna að rísa á hendur félaginu út af vátryggingu þessari, skulu rekin fyrir Héraðsdómi Reykjavíkur.

21.gr. Vernd persónuupplýsinga

Samkvæmt lögum um persónuvernd og meðferð persónuupplýsinga nr. 77/2000 á sá sem upplýsingar eru skráðar um rétt á að fá upplýsingar hjá félaginu um vinnslu persónu­upplýsinga um sig auk þess sem hann á rétt á því að félagið leiðrétti rangar, villandi eða ófullkomnar upplýsingar.

Félagið notar þær persónuupplýsingar sem aflað er vegna vátryggingar þessarar aðeins við mat á vátryggingarbeiðnum, í því skyni að meta þörf á vátryggingavernd og veita vátryggingartaka ráðgjöf um val á vátryggingum, við afgreiðslu bótakrafna, upplýsingagjöf til vátryggingartaka og við aðra eðlilega starfsemi félagsins.

Félagið leggur ríka áherslu á öryggi og trúnað við meðferð persónuupplýsinga. Upplýsingar um viðskiptavini félagsins eru ekki afhentar þriðja manni nema samkvæmt skýru umboði, lögum eða dómsúrskurði.



Skilmálar þessir gilda frá 1. febrúar 2008